Am Samstag um Zwöife is wieda so weit: Da Obabürgermoasda vo da Münchner Stodt – Dieter Reiter hoaßd a seit zwoa Johr – haud mit drei, via oder mehra Schläg' an Wechsel in' Hirschen, hebt an Schlegel o, sogt: "O'zapft is'! Auf a friedliche Wiesn 2016!" und gibt am Ministerpräsidenten vom Freistaat de erste Mass zum Zutzeln. Am Seehofer weard des Spaten im Schottenhamelzelt wia jed's Johr guad schmecka. Wann dann in drei Johr da Söder do steh' soit, kriagt er a Wassa - des schmeckt eahm eh vui bessa.

Heier is' glei füa 17 Dog da Rausch o'gsagt, wei da 3. Oktoba, da Dodesdog vom Franz-Josef, auf'n Mondog foid. Wia aba a jed's Johr wean a hoibe Million Leit' mehra de Stodt bevölkern, de wo sonst grod amoi oanahoib Millioana Leit' hod. Aba mit de Wiesngenga wead die Stodt scho fertig. A wenn's ned wissen, wann's mit de Mass'n langt und dann b'suffa umananda renna oda ihr'n Rausch unter da Bavaria ausschlaffa. Im ganz'n wean dann woi sechs oda fast siem Milliona Leit' auf da Wiesn g'wen sei – ned olle gleichzeitig, wei des ja klar is. Do homs dann sechs oder siem Milliona Mass'n drunka – olle mitanand, ned a jeda a so vui. Hend'l wean dann a Milliona für'n Hunga zwischen de Mass'n g'storbn sei und in da Ochsenbroderei war'n dann mehra ois wia hundert Ochsen am Spieß g'steckt.

Wann ma's ned übatreibt mit der Sauferei und da Fresserei ko's aba scho a Ries'ngaudi wean, obwois heia an Zaun um de ganze Wiesn baud hom, zwengs dera gfuiten Sichaheid. Grod schaud's in dera Weid ned a so guad aus, überoi Not, Elend, Kriag und Vertreibung, aba vielleicht soid ma ja grod deswegn a amoi a bissl feiern, damit ma danach wieda mehra Kraft für'n Ernst vom Leb'm hom. Oiso, schwoam ma's obe. Und wann ma ned zvui drunga hom, geh'n ma no aufs zentrale Landwirtschaftsfest, do wo da Bauersbua und as Bauersdeandl zoagn, wo de Ochs'n und Hendl her kumma. Des kost zwar an Eintritt und lafft ja bloß a Wocha, aber lohna duad' si des scho'.

Mia ham' aba no siem Buidln von dene Apps, de wo ma auf sei Apfe-Glumb drauf spuin ko, damit ma de Wiesn bessa übasteht. A Doimetscha waar fei a dabei:

(Macwelt)